حوار ساخن....... فى قهوة حنتيرة

فى مقهى حنتيرة يتجمع يوميا فهيمة الكورة يتناقشون فى كل ما يتعلق بالكورة على ارض مصر المحروسة
حوار الجميع اليوم حول النادى الأهلى وكيف أن الأهلى هو جالب السعادة للمصريين خاصة والمصريين عامة
وتعالو ا نجلس نشرب الشاى المظبوط ونسمع فقط دون تدخل أو تعليق

الكابتن: عليه النعمة الأهلى ده نادى ماحصل..مشرفنا ومفرحنا على طول

المعلم حنتيره: بس يا خوفى على اللعيبة اللى زى الورد اللى هاتقع زى خيل الحكومة من الإجهاد , بقى ياناس دول بشر ولا ألات حديد ؟؟!! مش حرام والنبى الجدول العجيب اللى بيعمله اتحاد الكورة ده ..الولاد بقالهم 3سنين مش لاحقين ياخدوا نفسهم

الرايق: لأ وإيه والحرب على النادى من كل ناحيه..إذا كان جرايد صفرة اولا اتحاد كورة بيتخبط كل يوم بقرار يسدد به فواتير الانتخابات وماشى فى وادى والدنيا كلها فى وادى ولا حكام بتتمنظر على الأهلى عشان الكل يتكلم عن شجاعتهم ولا جماهير حاقده بتكره الاهلى لمجرد انه البطل وماشى صح...

الفاهم: لأ وكله كوم وتحالف الاصفر والابيض كوم تانى ..تحالف الجريحين هههههههه..واللى يغيظ ان الابيض شغال زى اليهود مع الالمان وعقدة الذنب أيام هتلر...يا أخى عمالين يفهموا الاصفر انهم اصحاب المواقف التاريخية اللى كلها شهامه معاهم وبيزيفوا التاريخ لمصلحتهم ..مع ان الاصفر لو يقرأ صح يعرف ان مواقف الأهلى معاهم كلها مفخرة ..لكن هاتقول لمين ومين يفهم؟؟

المعلم حنتيره: طب عليه النعمة الاصفر ده مابيحب الا نفسه... وتضامنه مع الابيض بس كرها فى انتصارات الأهلى لا اكتر ولا أقل يعنى بالعربى الفصيح .. ليس حبا فى زيد ولكن كرها فى عمرو..

الكابتن: لأ والمهم إن الفرق التعبانه مش قادرة توصل للبطل عاوزه تجره معاها لتحت ..مرة تدعى ان الأهلى بيخطف اللعيبة الصح ومرة تانيه القايمة لازم تبقى25لاعب لأن الأهلى مكوش على الكل ومرة يدعوا ان الحكام بيهدوا البطولات للأهلى

الرايق: لأ وفرحانين قوى ان الأهلى انهزم من برشلونة ..ماراعوش اجهاد اللعيبة ولا راعوا أى ظروف...طب بس كانوا يشكلوا تيم من الاصفر والابيض ويواجهوا برشلونة..وحياتكم كانوا هربوا وسابوا الملعب...العالم دى بتفرح فى هزيمة الأهلى اكتر مابتفرح لفوز فرقتهم..

العاقل: وفى النهاية يا جماعة ايه اللى بيحصل؟؟ الذئاب تنبح والقافلة تسير...وانفرادات الأهلى لاتتوقف وأخرها 100بطولة فى100عام.والدورى السنة دى محجوز من بدرى

الزملكاوى: لأ بقى أنا ساكت لكم من الصبح ..الا حكاية الانفراد دى..الزمالك هو اللى هاينفرد يا عم العاقل.

العاقل: ههههههه ازاى بقى يا ابو المفهومية.. ده انتوا كل اللى حيلتكم 82بطولة وباقى بطولة الكاس والسوبر المصرى السنة دى ..يعنى حتى لو فزتم بالاتنين يبقى84 بطولة ..ولا عاوز تفهمنى انكم هاتفوزوا ب16بطولة فى تلات سنوات الجايين عشان تلحقوا الأهلى فى مئويتكم

الزملكاوى: لألأ حاسب أنا هاشرحهالك وهاعرفك ازاى هانعدى ال100بطولة كمان.. بس اللى كلامه مننا يطلع الصح يبقى مشاريب القهوة كلها النهاردة على التانى ..اتفقنا؟؟؟؟؟؟؟؟؟

العاقل: اتفقنا يا كنج ..فهمنا بقى ازاى تتخطى 100بطولة فى 3سنوات

الزملكاو: أقولك....طبعا عدد ابطولات سنويا 7بطولات.. الدورى وكاس مصر والسوبر المصرى والافريقية والسوبر الافريقى والعربية وكاس العالم للأندية نضربهم 3سنوات يبقى 21بطولة وبطولتين السنة دى يبقى 23 نجمعهم على 82بطولة عندنا يبقى كله 105 ...شفت بقى...يلا بقى حاسب ع المشاريب يا ابو عاقليييين.

العاقل: انت عاوز تفهمنى انكم هاتشتركوا فى كل البطولات دى..وكل الفرق بطيخ..وكمان لما توصولوا كاس العالم للأندية هاتفرموا الفرق كلها وتفوزوا بالبطولات التلاته؟؟؟!!!

الزملكاوى: اه طبعاا انت عندك شك ولا ايييه؟؟؟؟

العاقل: انت عبيط يالا

الزملكاوى: لأ زملكاوى ..ليه؟؟؟!!!!

وهنا انفجر جميع رواد المقهى فى الضحك حتى استلقوا على قفاهم ..ثم غادروا المقهى دون دفع الحساب وتركوا صاحبنا بمفردة فى مواجهة المعلم حنتيرة

المعلم حنتيرة:
إيدك على حساب مشاريب القهوة النهارده يا فكيك...انت راجل زملكاوى عتره..يلا خف ايدك وهات الأوبيج..مش انت زملكاوى برضه؟؟قهقهقهقهقه

الزملكاوى وهو مزعور: لالالالا يا معلم أنا العبيط والله.

_________________

طيب انت اتكلمت على كل الموجودين ونسيت اهم واحد وهو المعلم حنتيرة صاحب القهوة زات نفسة

ماشى يا محفوظ حلوة اوى التريقة دى بس هقولك ليك يوم يا مغروررررررررررررررررر